‘‘ปริจิณฺโณ มยา สตฺถา, กตํ พุทฺธสฺส สาสนํ;
โอหิโต ครุโก ภาโร, ภวเนตฺติ สมูหตา’’ติฯ
… องฺคุลิมาโล เถโร…ฯ
9. อนุรุทฺธตฺเถรคาถา
[892]
‘‘ปหาย มาตาปิตโร, ภคินี ญาติภาตโร;
ปญฺจ กามคุเณ หิตฺวา, อนุรุทฺโธว ฌายตุฯ
[893]
‘‘สเมโต นจฺจคีเตหิ, สมฺมตาฬปฺปโพธโน;
น เตน สุทฺธิมชฺฌคํ [สุทฺธมชฺฌคา (สี. ก.), สุทฺธิมชฺฌคมา (สฺยา.)], มารสฺส วิสเย รโตฯ
[894]
‘‘เอตญฺจ สมติกฺกมฺม, รโต พุทฺธสฺส สาสเน;
สพฺโพฆํ สมติกฺกมฺม, อนุรุทฺโธว ฌายติฯ
[895]
‘‘รูปา สทฺทา รสา คนฺธา, โผฏฺฐพฺพา จ มโนรมา;
เอเต จ สมติกฺกมฺม, อนุรุทฺโธว ฌายติฯ
[896]
‘‘ปิณฺฑปาตปฏิกฺกนฺโต, เอโก อทุติโย มุนิ;
เอสติ ปํสุกูลานิ, อนุรุทฺโธ อนาสโวฯ
[897]
‘‘วิจินี อคฺคหี โธวิ, รชยี ธารยี มุนิ;
ปํสุกูลานิ มติมา, อนุรุทฺโธ อนาสโวฯ
[898]
‘‘มหิจฺโฉ จ อสนฺตุฏฺโฐ, สํสฏฺโฐ โย จ อุทฺธโต;
ตสฺส ธมฺมา อิเม โหนฺติ, ปาปกา สํกิเลสิกาฯ
[899]
‘‘สโต จ โหติ อปฺปิจฺโฉ, สนฺตุฏฺโฐ อวิฆาตวา;
ปวิเวกรโต วิตฺโต, นิจฺจมารทฺธวีริโยฯ
[900]
‘‘ตสฺส ธมฺมา อิเม โหนฺติ, กุสลา โพธิปกฺขิกา;
อนาสโว จ โส โหติ, อิติ วุตฺตํ มเหสินาฯ
[901]
‘‘มม สงฺกปฺปมญฺญาย, สตฺถา โลเก อนุตฺตโร;
มโนมเยน กาเยน, อิทฺธิยา อุปสงฺกมิฯ
[902]
‘‘ยทา เม อหุ สงฺกปฺโป, ตโต อุตฺตริ เทสยิ;
นิปฺปปญฺจรโต พุทฺโธ, นิปฺปปญฺจมเทสยิฯ
[903]
‘‘ตสฺสาหํ ธมฺมมญฺญาย, วิหาสิํ สาสเน รโต;
ติสฺโส วิชฺชา อนุปฺปตฺตา, กตํ พุทฺธสฺส สาสนํฯ
[904]
‘‘ปญฺจปญฺญาสวสฺสานิ , ยโต เนสชฺชิโก อหํ;
ปญฺจวีสติวสฺสานิ, ยโต มิทฺธํ สมูหตํฯ
[905]
[ที. นิ. 2.222] ‘‘นาหุ อสฺสาสปสฺสาสา, ฐิตจิตฺตสฺส ตาทิโน;
อเนโช สนฺติมารพฺภ, จกฺขุมา ปรินิพฺพุโตฯ
[906]
[ที. นิ. 2.222] ‘‘อสลฺลีเนน จิตฺเตน, เวทนํ อชฺฌวาสยิ;
ปชฺโชตสฺเสว นิพฺพานํ, วิโมกฺโข เจตโส อหุฯ
[907]
‘‘เอเต ปจฺฉิมกา ทานิ, มุนิโน ผสฺสปญฺจมา;
นาญฺเญ ธมฺมา ภวิสฺสนฺติ, สมฺพุทฺเธ ปรินิพฺพุเตฯ
[908]
‘‘นตฺถิ ทานิ ปุนาวาโส, เทวกายสฺมิ ชาลินิ;
วิกฺขีโณ ชาติสํสาโร, นตฺถิ ทานิ ปุนพฺภโวฯ
[909]
‘‘ยสฺส มุหุตฺเตน สหสฺสธา, โลโก สํวิทิโต สพฺรหฺมกปฺโป;
วสี อิทฺธิคุเณ จุตูปปาเต, กาเล ปสฺสติ เทวตา ส ภิกฺขุ [สภิกฺขุโน (สี. ก.)]ฯ
[910]
‘‘อนฺนภาโร [อนฺนหาโร (สี.)] ปุเร อาสิํ, ทลิทฺโท ฆาสหารโก;
สมณํ ปฏิปาเทสิํ, อุปริฏฺฐํ ยสสฺสินํฯ
[911]
‘‘โสมฺหิ สกฺยกุเล ชาโต, อนุรุทฺโธติ มํ วิทู;
อุเปโต นจฺจคีเตหิ, สมฺมตาฬปฺปโพธโนฯ
[912]
‘‘อถทฺทสาสิํ สมฺพุทฺธํ, สตฺถารํ อกุโตภยํ;
ตสฺมิํ จิตฺตํ ปสาเทตฺวา, ปพฺพชิํ อนคาริยํฯ
[913]
‘‘ปุพฺเพนิวาสํ ชานามิ, ยตฺถ เม วุสิตํ ปุเร;
ตาวติํเสสุ เทเวสุ, อฏฺฐาสิํ สกฺกชาติยา [สตชาติยา (สี.)]ฯ
[914]
‘‘สตฺตกฺขตฺตุํ มนุสฺสินฺโท, อหํ รชฺชมการยิํ;
จาตุรนฺโต วิชิตาวี, ชมฺพุสณฺฑสฺส อิสฺสโร;
อทณฺเฑน อสตฺเถน, ธมฺเมน อนุสาสยิํฯ
[915]
‘‘อิโต สตฺต ตโต สตฺต, สํสารานิ จตุทฺทส;
นิวาสมภิชานิสฺสํ, เทวโลเก ฐิตา ตทาฯ
[916]
‘‘ปญฺจงฺคิเก สมาธิมฺหิ, สนฺเต เอโกทิภาวิเต;
ปฏิปฺปสฺสทฺธิลทฺธมฺหิ, ทิพฺพจกฺขุ วิสุชฺฌิ เมฯ
[917]
‘‘จุตูปปาตํ ชานามิ, สตฺตานํ อาคติํ คติํ;
อิตฺถภาวญฺญถาภาวํ, ฌาเน ปญฺจงฺคิเก ฐิโตฯ
[918]
‘‘ปริจิณฺโณ มยา สตฺถา…เป.… ภวเนตฺติ สมูหตาฯ
[919]
‘‘วชฺชีนํ เวฬุวคาเม, อหํ ชีวิตสงฺขยา;
เหฏฺฐโต เวฬุคุมฺพสฺมิํ, นิพฺพายิสฺสํ อนาสโว’’ติฯ
… อนุรุทฺโธ เถโร…ฯ
10. ปาราปริยตฺเถรคาถา
[920]
สมณสฺส อหุ จินฺตา, ปุปฺผิตมฺหิ มหาวเน;
เอกคฺคสฺส นิสินฺนสฺส, ปวิวิตฺตสฺส ฌายิโนฯ
[921]
‘‘อญฺญถา โลกนาถมฺหิ, ติฏฺฐนฺเต ปุริสุตฺตเม;
อิริยํ อาสิ ภิกฺขูนํ, อญฺญถา ทานิ ทิสฺสติฯ
[922]
‘‘สีตวาตปริตฺตานํ, หิริโกปีนฉาทนํ;
มตฺตฏฺฐิยํ อภุญฺชิํสุ, สนฺตุฏฺฐา อิตรีตเรฯ
[923]
‘‘ปณีตํ ยทิ วา ลูขํ, อปฺปํ วา ยทิ วา พหุํ;
ยาปนตฺถํ อภุญฺชิํสุ, อคิทฺธา นาธิมุจฺฉิตาฯ
[924]
‘‘ชีวิตานํ ปริกฺขาเร, เภสชฺเช อถ ปจฺจเย;
น พาฬฺหํ อุสฺสุกา อาสุํ, ยถา เต อาสวกฺขเยฯ
[925]
‘‘อรญฺเญ รุกฺขมูเลสุ, กนฺทราสุ คุหาสุ จ;
วิเวกมนุพฺรูหนฺตา, วิหํสุ ตปฺปรายนาฯ
[926]
‘‘นีจา นิวิฏฺฐา สุภรา, มุทู อตฺถทฺธมานสา;
อพฺยาเสกา อมุขรา, อตฺถจินฺตา วสานุคาฯ
[927]
‘‘ตโต ปาสาทิกํ อาสิ, คตํ ภุตฺตํ นิเสวิตํ;
สินิทฺธา เตลธาราว, อโหสิ อิริยาปโถฯ
[928]
‘‘สพฺพาสวปริกฺขีณา, มหาฌายี มหาหิตา;
นิพฺพุตา ทานิ เต เถรา, ปริตฺตา ทานิ ตาทิสาฯ
[929]